Втора тренерска смена за една недела во Серија А, Џенова и Виеира се разделија

Поранешниот француски репрезентативец Патрик Виеира е ослободен од должноста тренер на италијанскиот прволигаш Џенова, кој е на дното на табелата во Серија А по девет натпревари.

Клубот соопшти дека Виеира „веќе не е на чело на првиот тим“, а весникот „Газета дело Спорт“ наведе дека Французинот поднел оставка.

Виеира, кој како фудбалер ја освои светската титула со Франција, седна на клупата на Џенова пред една година како замена за Алберто Џилардино и откако обезбеди опстанок минатата сезона потпиша нов двегодишен договор.

Сепак, Џенова загуби шест од своите девет натпревари оваа сезона, вклучувајќи го и поразот од 2-0 од новопромовираниот Кремонезе минатиот викенд.

Ова е втора тренерска смена во италијанската лига оваа недела, откако Лучијано Спалети седна на клупата на Јувентус на местото на Игор Тудор, кому во понеделникот му беше врачен отказ.