Левандовски се враќа во репрезентацијата со капитенската лента

Фудбалерот на Барселона, Роберт Левандовски, се враќа во полската репрезентација и повторно ќе биде капитен, јавија синоќа западните агенции.
Левандовски се повлече од репрезентацијата поради несогласувања со претходниот селектор Михал Пробиеж, но неговиот наследник Јан Урбан повторно го повика во националниот тим.
Полска ќе игра квалификациски натпревар за Светското првенство против Холандија на 7 септември и против Финска три дена подоцна.
„Да речеме дека го започнуваме тренинг кампот со чисти сметки. Роберт Левандовски ќе биде капитен на нашиот тим“, рече Урбан.
Левандовски беше привремено надвор од националниот тим, откако Пробиеж му ја одзеде капитенската лента во јуни.