Германската влада ја планира првата централа за нуклеарна фузија до 2040-тите години

Првата комерцијална централа за нуклеарна фузија во светот треба да почне со работа во Германија во 2040-тите години, според долгорочните планови на германската влада.

Оваа цел беше зацртана во „патоказот“ за постигнување на целите во областа на фузиската енергија, кој денеска во Берлин го објави Сојузното министерство за истражување, пренесе ДПА.

Целта е до крајот на 2030-тите години во Германија да се изгради првата во светот демонстрациона централа за фузија, а во 2040-тите години и првата комерцијална фузиска централа во светот.

Политички, големи надежи се полагаат во фузиската енергија, која се генерира кога атомските јадра се спојуваат под многу високи температури и притисоци, за разлика од нуклеарната фисија во конвенционалните нуклеарни централи. Теоретски, ова би можело да се искористи за генерирање големи количини енергија на климатски неутрален начин.

Ширум светот се спроведуваат истражувања за тоа како ова би можело да се примени во една централа. И покрај неодамнешниот напредок, експертите не се сигурни дали тоа на крајот ќе успее. Она што е сигурно е дека фузијата нема да биде брзо решение за моменталните енергетски проблеми.

Покрај патоказот за фузиска енергија, германското Министерство за истражување објави и патокази со цели за уште пет други клучни технологии кои се идентификувани како централни за иднината на земјата: вештачка интелигенција, квантни технологии, микроелектроника (чипови), биотехнологија и технологии за климатски неутрална мобилност. Овие области треба соодветно да бидат финансирани и развивани.