Кандидатката за претседателка на Колумбија, Валенсија ќе ја укине политиката на „целосен мир“

Кандидатката на колумбискиот десничарски Демократски центар на претседателските избори во Колумбија, Палома Валенсија, изјави дека, доколку победи на изборите на 31 мај, ќе ја укине политиката на „целосен мир“ на актуелниот претседател Густаво Петро и ќе спроведе поостра безбедносна стратегија против вооружените групи.

Таа наведе дека повторно ќе ги активира налозите за апсење и ќе ги зајакне безбедносните сили во соработка со Соединетите Американски Држави.

– Политиката на целосен мир завршува со мене. Ќе започне политиката на целосна безбедност – рече Валенсија.

Валенсија, кандидатка на партијата на поранешниот претседател Алваро Урибе, се противи на продолжувањето на мировните преговори со дисидентските фракции на поранешниот ФАРК, герилското движење Национална ослободителна армија (ЕЛН) и криминалните групи како што е Заливскиот клан.

Владата на Петро се обидува преку преговори да го прекине повеќедеценискиот конфликт во Колумбија, во кој загинаа повеќе од 450.000 луѓе, но преговорите досега не донесоа резултати, а до крајот на мандатот на Петро остануваат помалку од три месеци.

Програмата на Палома Валенсија се заснова на зајакнување на безбедноста, вклучувајќи зголемување на бројот на полицајци и војници за 60.000 припадници, како и обнова на прскањето на насадите со кока од воздух со хербициди кои не содржат глифосат, чија употреба беше ограничена во 2015 година поради здравствени ризици.

Зборувајќи за економијата, Валенсија најави зголемување на производството на нафта, гас и руда, вклучувајќи ја и експлоатацијата со методот на хидраулично фрактурирање со мерки за заштита на животната средина, за разлика од политиката на Петро за ограничување на развојот на нови проекти во секторот за фосилни горива.

– Ќе ги поттикнуваме истражувањето и производството на нафта, гас, јаглен, минерали и ретки земјени елементи, со зачувување на животната средина – рече таа, додавајќи дека хидрауличното фрактурирање нема да биде дозволено во Амазонија и во планинските екосистеми Парамо.

Според неа, раст од пет проценти во рударскиот, енергетскиот и градежниот сектор би можел да обезбеди дополнителни 7,9 милијарди долари за финансирање на социјалните програми.

Валенсија исто така предложи намалување на данокот на доход, укинување на данокот на богатство и на финансиските трансакции, како и поддршка за регионалната безбедносна иницијатива „Американски штит“, предводена од САД.

Право на глас на претседателските избори на 31 мај имаат повеќе од 41 милион граѓани на Колумбија. Доколку ниту еден кандидат не освои мнозинство од гласовите, вториот круг меѓу двајцата најдобро пласирани кандидати ќе се одржи на 21 јуни.