Владата на Боливија побара од амбасадорот на Колумбија да ја напушти земјата

Владата на Боливија побара од амбасадорот на Колумбија да ја напушти земјата, повикувајќи се на загриженост за суверенитетот и мешање во внатрешните работи, соопшти денеска Министерството за надворешни работи на Боливија.

До овој чекор дојде откако претседателот на Колумбија, Густаво Петро, на 17 мај на Х ги опиша немирите во Боливија како „народно востание“.

Поради ширењето на немирите во Боливија, банките ги затвораат своите филијали во Ла Паз, а блокадите на патиштата го попречуваат снабдувањето, додека синдикатите, рударите и руралните групи бараат економска помош, а некои бараат и оставка од претседателот Родриго Паз, јавија светските агенции.

Заменикот на американскиот државен секретар, Кристофер Ландау, вчера изјави дека разговарал со Паз и го предупредил дека поразените сили од минатогодишните избори се обидуваат да го сменат од власт. Европската Унија и неколку европски амбасади во меѓувреме повикаа на дијалог и мирни протести.

Министерството за надворешни работи на Боливија наведе дека одлуката е донесена во согласност со меѓународното право и оти не претставува прекин на дипломатските односи со Колумбија.