Анита Орбан: Заштитата на правата на малцинствата останува клучно прашање меѓу Унгарија и Украина

Унгарија и Украина ги започнаа експертските консултации, соопшти унгарската министерка за надворешни работи Анита Орбан, која ги оцени разговорите како важен чекор кон обновување на билатералните односи.

Орбан потсети дека минатата недела се одржаа прелиминарни преговори со учество на украинскиот министер за надворешни работи Андриј Сибиха и украинскиот вицепремиер Тарас Качка.

– Овие консултации се важен чекор кон обновување на нашите билатерални односи и зајакнување на идната соработка – изјави Орбан.

Таа нагласи дека Унгарија останува посветена на суверенитетот и територијалниот интегритет на Украина, но воедно инсистира дека заштитата на правата на малцинствата останува главното прашање во односите меѓу двете држави што мора да се реши.

– Унгарската заедница во Закарпатија не е само важен дел од односите меѓу нашите две земји, туку и мост меѓу нашите народи – истакна таа.

Според Орбан, реален напредок во преговорите може да биде постигнат само преку „отворен, чесен и експертски дијалог“, кој ќе се заснова на јасни правни гаранции. Министерката изрази уверување дека денешните консултации можат да означат почеток на еден нов позитивен процес меѓу Будимпешта и Киев.