Ким и Путин разменија пораки за Денот на ослободувањето: Пријателството меѓу Пјонгјанг и Москва се развива во сите области

Севернокорејскиот лидер Ким Џонг-ун го потврди продлабочувањето на односите меѓу Пјонгјанг и Москва во порака до рускиот претседател Владимир Путин по повод 81-годишнината од ослободувањето на Кореја од јапонското колонијално владеење, соопшти севернокорејската државна новинска агенција КЦНА.

Ким одговори на честитката од Путин по повод годишнината од капитулацијата на Јапонија во Втората светска војна, којашто беше одбележана вчера.

Рускиот претседател изјави дека односите меѓу двете земји биле воспоставени во времето кога советските војници се бореле против Јапонија и изрази уверување дека соработката меѓу Москва и Пјонгјанг ќе продолжи да се развива „во сите области“.
Ким, од своја страна, изрази надеж за натамошен развој на односите, кои, според него, „ја пренесоа историјата на заедничката борба за правда и вредните традиции на пријателството“ во иднината.

Односите меѓу Северна Кореја и Русија значително се продлабочија откако Пјонгјанг почна да испраќа војници и оружје како поддршка за Русија во војната против Украина. Тоа е најзначајното директно учество на Северна Кореја во вооружен конфликт по Корејската војна од 1950 до 1953 година.

Во меѓувреме, рускиот школски едреник „Палада“ вчера пристигна во севернокорејското пристаниште Вонсан во посета на добра волја по повод годишнината од ослободувањето. Бродот го пречекаа претставници на локалните власти и службеници на руската амбасада, соопшти КЦНА.

Истовремено, јужнокорејскиот претседател Ли Џе-мјунг повика на обновување на дијалогот со Северна Кореја со цел мирен соживот. На церемонијата по повод Денот на ослободувањето во Сеул, тој изјави дека на двете Кореи им се потребни гаранции за спречување конфликти и дека треба да работат на замена на сегашното примирје со „мировен режим“.

Тој повика на дијалог што би довел до официјално завршување на Корејската војна. Конфликтот заврши во 1953 година со примирје, но без потпишување мировен договор. Според јужнокорејскиот претседател, преговорите би можеле да ги опфатат и можностите за ограничување на севернокорејската нуклеарна програма.

Северна Кореја засега ги отфрла предлозите на Ли за дијалог и ги дефинира заедничките воени вежби на САД и Јужна Кореја како провокација.

Напнатост оваа недела се појави и меѓу Русија и Јапонија. Во четвртокот Путин посети остров во близина на Хокаидо, на кој Токио полага територијално право. Москва воспостави контрола врз островот на крајот од Втората светска војна, а посетата на рускиот претседател предизвика осуда од јапонска страна.