Полска: Качински ги исклучи Моравјецки и економски либералното крило од „Право и правда“

Полската опозициска партија „Право и правда“ (ПиС) го исклучи од своите редови поранешниот премиер Матеуш Моравјецки и голема група пратеници по длабокиот внатрепартиски раскол, соопшти денеска за јавниот сервис ТВП претседателот на дисциплинското тело на партијата, а пренесе агенцијата ДПА.

Исклучувањето опфаќа вкупно 38 пратеници, меѓу кои и Моравјецки, како и двајца сенатори. Внатрешното дисциплинско тело утврдило дека тие го прекршиле партискиот статут со тоа што ја напуштиле пратеничката група на ПиС и формирале сопствена пратеничка група. Конзервативната партија ПиС претходно имаше 181 место во Сејмот (долниот дом на полскиот парламент) и 33 места во Сенатот (горниот дом).

Расколот во партијата ескалираше кон крајот на минатиот месец по борбата за власт меѓу 77-годишниот основач на ПиС, Јарослав Качински, и 58-годишниот Моравјецки. Моравјецки одби да го поддржи дополнителното „свртување надесно“ што го наметна Качински и заедно со други претставници на економски либералното крило формираше внатрепартиска фракција наречена „Развој плус“.

Качински побара итно распуштање на групата и упати ултиматум до сите членови да потпишат декларација за лојалност. Откако Моравјецки ги отфрли двете барања и објави формирање независна пратеничка група, против него и неговите поддржувачи од „Развој плус“ беше почната постапката за исклучување.

Партијата „Право и правда“ управуваше со Полска од 2015 до 2023 година. Во тој период таа спроведе опсежни реформи на судскиот систем, кои доведоа до сериозни конфликти со Европската комисија. По поразот на парламентарните избори во октомври 2023 година, ПиС ја презеде улогата на најголема опозициска партија во земјата.