Петнаесет лица лишени од слобода изминатите 24 часа поради безобѕирно управување моторно возило

Полициските службеници во текот на изминатото деноноќие на целата територија на државата, лишија од слобода 15 лица поради сторено кривично дело „безобѕирно управување со моторно возило“ по член 297-а од Кривичниот законик, соопшти Министерството за внатрешни работи.

Од нив, осум лица управувале моторно возило без возачка дозвола, од кои четири малолетници, четири лица управувале возило под дејство на алкохол, едно лице управувало возило со активна забрана, едно лице возело без возачка дозвола и под дејство на алкохол и едно лице возело под дејство на алкохол со активна забрана.

По целосно документирање на случаите, против лицата ќе бидат поднесени соодветни кривични пријави.

МВР апелира сите учесници во сообраќајот доследно да ги почитуваат сообраќајните правила и прописи, да не управуваат моторно возило без возачка дозвола, доколку имаат изречена мерка за забрана за управување, ниту под дејство на алкохол.

-Одговорното однесување во сообраќајот е заедничка обврска и клучен предуслов за поголема безбедност на сите граѓани – додаваат од МВР.