Обвинителството: Поранешната британска пратеничка Ен Видиком била удрена 21 пат со чекан

Мажот обвинет за убиството на поранешната британска пратеничка Ен Видиком ѝ нанел 21 удар со чекан во главата за време на нападот во нејзиниот дом претходно овој месец, соопшти денеска обвинителството пред судот во Лондон.

Седумдесет и осумгодишната Видиком, една од препознатливите личности на популистичката партија „Реформирај го Обединетото Кралство“ на Најџел Фараж, беше пронајдена мртва на 9 јули во својот дом во југозападна Англија. Истрагата покажува дека нападот бил извршен еден ден претходно.

Пред Вестминстерскиот магистратски суд се појави 28-годишниот британски државјанин Џошуа Кери, против кого е поднесено обвинение за убиство. Во оваа фаза тој сè уште не се изјаснил по обвинението.

Обвинителот Кашиф Малик изјави дека безбедносната камера во домот на Видиком го снимила нападот, при кој таа повеќепати била удирана со чекан.

Според обвинителството, на 8 јули Видиком требало да се вклучи во телевизиско интервју во живо од својот дом, но не се појавила во програмата.

Следниот ден нејзината лична асистентка го замолила градинарот да ја провери, по што тој ја пронашол како лежи на подот во кујната.

Снимките од безбедносната камера, според обвинителството, покажуваат како Кери влегува во куќата додека Видиком ручала и ја прашува:

– Дали случајно имате банкарски картички и лична карта?

Обвинителството наведува дека потоа ѝ нанел 21 удар со чекан во главата, го зел нејзиниот паричник и ја напуштил куќата.