Игрите на среќа во Црна Гора генерираа приходи од речиси 20 милиони евра за пет месеци

Управата за игри на среќа на Црна Гора во првите пет месеци од 2026 година собрала вкупно 19,96 милиони евра приходи, што претставува зголемување за 33,69 отсто на годишно ниво, јави црногорската агенција МИНА.

Според официјалното соопштение на Управата, резултатот постигнат во мај е особено забележителен, со остварени приходи од 4,38 милиони евра. Оваа бројка претставува скок од дури 81,83 отсто во споредба со истиот месец минатата година, со што се потврдуваат силно изразените позитивни тенденции во овој сектор.

Највисок раст е забележан во сегментот на онлајн обложувањето, каде што приходите достигнаа 8,7 милиони евра, односно за 41,68 отсто повеќе во споредба со истиот период лани.

„Приходите од игрите на среќа во клубовите со апарати (слот-клубови) изнесуваат 4,58 милиони евра, што е раст од 56,87 отсто, додека останатите хазартни игри генерираа 4,56 милиони евра, или за 12,63 отсто повеќе на годишно ниво“, се прецизира во соопштението.

Во исто време, приходите од казината изнесуваат 2,07 милиони евра, бележејќи раст од 16,73 отсто. Од Управата нагласуваат дека ваквите резултати се должат пред сè на унапредувањето на регулаторната и надзорната рамка, како и на поефикасната наплата на финансиските обврски од страна на операторите.