Меѓународна воена вежба во близина на Бујановац, учествуваат повеќе од 550 војници

Меѓународната тактичка вежба „Платинаст волк 26“, организирана од српската армија, се одржува од 1 до 13 јуни на воени полигони и полигоните за обука во близина на Бујановац, соопшти денеска Министерството за одбрана на Србија.

Вежбата е организирана со поддршка на Европската команда на вооружените сили на САД. Во вежбата учествуваат повеќе од 550 припадници на српската армија и вооружените сили на Азербејџан, Босна и Херцеговина, Грција, Унгарија, Италија, Романија, Северна Македонија, САД, Црна Гора и Обединетото Кралство на Велика Британија и Северна Ирска.

„Целта е размена на искуства и практики во работата, како и подобрување на обуката и меѓусебното разбирање на вооружените сили на партнерските земји за време на извршување на операција за поддршка на мирот“, се нагласува во соопштението.

Во следните две недели, војниците ќе вежбаат низа тактички сценарија – од обезбедување бази, објекти и конвои, до патролирање, блокирање и пребарување на теренот, до борба во урбана средина на локациите на базата „Југ“, на полигонот „Боровац“ и на стрелиштето „Вртогош“.