Украина ќе купи 20 нови авиони „Грипен“, а Шведска ќе донира постари модели

Украина ќе купи 20 нови борбени авиони „Грипен“, а Шведска ќе донира 16 од постариот тип следната година, изјавија украинскиот претседател Володимир Зеленски и шведскиот премиер Улф Кристерсон на денешната заедничка прес-конференција.

Двајцата лидери минатата година потпишаа писмо за намери што го отвора патот Шведска да и продаде на Украина до 150 борбени авиони од моделот „Сааб Грипен Е“, но испораките на поновиот модел се очекуваат за неколку години.

Авионите се приоритет за украинските воздухопловни сили, а министерот за одбрана Федоров во мај изјави дека договорот за авионите „Грипен Е“ би можел да биде потпишан „во рок од неколку месеци“ откако Европската унија го одобри заемот од 90 милијарди евра за Украина.

„Грипен е најдобриот и оптимален избор за Украина. Затоа, денеска го правиме следниот голем чекор во ова заедничко патување“, рече Кристерсон на прес-конференција со Зеленски во воздухопловната база во Упсала, каде што беа изложени два авиони „Грипен“.

„Ни требаат овие авиони и ова е навистина нова страница за Украина“, рече Зеленски, додавајќи дека планираат да ги купат сите 150 авиони предвидени во првичното писмо за намери. „Ако даде Бог, ќе имаме доволно пари за тоа“, рече тој.

Трансферот на постари модели C/D во меѓувреме обезбедува привремено решение за украинската воздушна одбрана.

Зеленски рече дека Украина за овој тип авион издвоила 2,5 милијарди евра од пакетот за заем на ЕУ од 90 милијарди евра.

Се очекува новиот модел на авион да пристигне во Украина од 2030 година.

Шведска е еден од најголемите донатори на Украина и досега испратила воена и цивилна помош во вредност од 128 милијарди шведски круни (13,75 милијарди американски долари). Исто така, издвои 80 милијарди круни помош за оваа и следната година.