Мицкоски во Туминец: Македонците во Албанија се нераскинлив дел од нашето национално ткиво, матицата нема да ве заборави

На Македонија денес ѝ е потребно обединување, повеќе од кога било претходно. Премиерот Христијан Мицкоски на средба со Македонците во Албанија испрати силни пораки и поддршка за нашинците. На средбата со жителите од Преспа, Мала Преспа и Туминец, Мицкоски порача дека тие се нераскинлив дел од националното ткиво и им изрази поддршка за сè она што досега го направиле за Македонија.

„На Македонија денес повеќе од сè ѝ е потребно обединување. Да се обединиме околу националните интереси. Околу иднината на нашите деца. Околу почитта кон сопствената историја и достоинството на народот. Нашите предци не се делеа кога ја бранеа слободата. Не прашуваа кој од каде е, ниту кој на кого припаѓа. Сите стоеја под едно име – Македонија“, посочил Мицкоски.

Премиерот потенцираше дека истрајноста на Македонците во овој крај низ децениите е подвиг достоен за почит.

„Вие го сочувавте македонското име, јазикот, традицијата и духот и тогаш кога било најтешко. И затоа денес сакам јасно да порачам: Матицата нема да ве заборави. Македонија стои со својот народ каде и да е, со почит, со грижа и со искрена поддршка“, нагласи премиерот Мицкоски.

Инаку, под мотото „Чест за хероите, завет за иднината“, Македонците од Мала Преспа денеска во Туминец организираа посебна свеченост за оддавање почит на хероите од овој крај. Заедно со премиерот Мицкоски, на манифестацијата беше присутен и министерот за култура Зоран Љутков.