Вучиќ по работната вечера во Брисел: Србија цврсто е посветена на членството во ЕУ и останува сигурен и одговорен партнер

Српскиот претседател Александар Вучиќ присуствуваше на работна вечера во Брисел организирана од претседателката на Европската комисија Урсула фон дер Лајен и претседателот на Европскиот совет Антонио Кошта.
„Во разговорот, посебно внимание посветивме на енергетскиот сектор, со фокус на енергетската безбедност и стабилност на Србија“, објави Вучиќ на Инстаграм.

„Србија е цврсто посветена на својата стратешка цел, членство во ЕУ, и останува сигурен и одговорен партнер на ЕУ во сите процеси што придонесуваат за мирот, стабилноста и просперитетот на нашите граѓани“, изјави српскиот претседател Александар Вучиќ.

На својот Инстаграм профил објави дека со претставниците на ЕУ разговарал за европскиот пат на Србија, енергетската безбедност и стабилност на државата, како и за ситуацијата во регионот.

„Голема чест за Србија е што имав можност вечерва во Брисел да разговарам со претседателката на Европската комисија Урсула фон дер Лајен и претседателот на Европскиот совет Антонио Кошта за клучните прашања од билатералните односи меѓу Србија и ЕУ и нашиот европски пат. Благодарен сум за нивното гостопримство и искрената поддршка за нашата земја, нашиот европски пат, како и за нашата агенда за реформи и развој“, напиша Вучиќ.

Тој додаде дека разменил мислења со своите домаќини за сите чекори што ги презела Србија за спроведување на реформите и исполнување на своите обврски.
„Посебно внимание беше ставено на енергетскиот сектор, со фокус на енергетската безбедност и стабилност на Србија. Разговаравме и за моментумот во европската политика за проширување, ситуацијата во регионот, како и за можностите за забрзување на нашиот европски пат“.