Санду: Русија ја користи понудата за државјанство на жителите на Приднестровје за мобилизација

Претседателката на Молдавија, Маја Санду, денеска оцени дека Русија ја користи понудата за државјанство на жителите на Приднестровје за целите на мобилизација и додаде дека на руските власти „веројатно им требаат повеќе луѓе за да ги испратат во војната во Украина“.

Рускиот претседател Владимир Путин во петокот потпиша декрет со кој им се дозволува на жителите на Приднестровје, отцепен регион од Молдавија, да добијат руско државјанство без да мора да живеат во Русија или да зборуваат руски.

Молдавската претседателка изјави на социјалните мрежи дека тоа е една од тактиките на Русија да ја загрози Молдавија поради нејзините напори за реинтегрирање на Приднестровје, регионот поддржан од Москва во источна Молдавија, каде што руските сили се стационирани од распадот на Советскиот Сојуз.

„Од почетокот на војната во Украина, повеќето жители на регионот се одлучија за молдавско државјанство, бидејќи се чувствуваа побезбедно со молдавско државјанство отколку со руско државјанство“, рече Маја Санду.

Молдавија доби статус на кандидат за членство во Европската Унија во 2022 година, а официјално ги започна преговорите за приклучување кон блокот во 2024 година.с