Речиси 40 земји се обврзаа да се приклучат на специјалниот трибунал за Украина

Вкупно 36 земји и Европската Унија се обврзаа да се приклучат на договорот за воспоставување на специјален трибунал за гонење на злосторствата извршени за време на војната на Русија против Украина, соопшти денеска Советот на Европа.

– Овие држави презедоа одлучувачки чекор кон вистинското воспоставување на Специјалниот трибунал и признавањето на одговорностите за агресијата врз Украина – изјави генералниот секретар на Советот на Европа, Ален Берсет, на состанокот на министрите за надворешни работи на 46-члениот совет во Кишињев.

– Специјалниот трибунал претставува правда и надеж. Сега треба да се преземат дејствија за да се реализира оваа политичка заложба преку обезбедување на функционирањето и финансирањето на Трибуналот. Брзо се приближува времето кога Русија ќе биде повикана на одговорност за својата агресија – додаде тој.

Советот на Европа, со седиште во Стразбур, е посветен на заштитата на човековите права и владеењето на правото во своите 46 земји-членки. Тој е независен од ЕУ.

Меѓународното тело за човекови права ги помина изминатите месеци подготвувајќи го трибуналот, кој ќе биде со седиште во Хаг и има за цел да ги повика на одговорност високите руски раководни личности за одлуката да почнат агресивна војна против Украина.

Трибуналот треба да пополни одредена празнина, бидејќи Меѓународниот кривичен суд, исто така со седиште во Хаг, има само ограничена надлежност, со тоа што е ограничен на истражување на можни воени злосторства, злосторства против човештвото и геноцид.

Потребни се дополнителни чекори пред да може да се воспостави новиот специјален трибунал, при што најпрво треба да се одреди и обезбеди буџет.

Земјите што ја даваат својата поддршка вклучуваат членки на Советот на Европа како Франција, Германија, Полска, Обединетото Кралство и самата Украина. Костарика и Австралија, исто така, го најавија своето учество