Европол: Уапсени 27 лица, идентификувани 248 потенцијални жртви на трговија со луѓе

Во прекугранична операција против трговија со луѓе со цел трудова експлоатација, уапсени се 27 лица, идентификувани се 248 потенцијални жртви и започнати се 182 нови истраги, објави денеска Европол.

Како што е наведено, операцијата е спроведена од 14 до 20 септември во 34 земји, во која учествувале повеќе од 16.000 полицајци, а целна група се сектори со висок ризик, вклучувајќи земјоделство, градежништво, услуги за убавина, салони за масажа и угостителство.  

За време на акцијата, проверени се 137.810 субјекти, а покрај 27 апсења за трговија со луѓе, уапсени се уште 86 лица за други кривични дела. Акцијата била насочена кон експлоатација на работници во земјоделството, градежништвото, угостителството и салоните за убавина. Откриени се и случаи на сексуална експлоатација, принудно просење и домашно ропство.

Според резултатите, мажите сочинувале 73 проценти од потенцијалните жртви, а тие најчесто биле експлоатирани во градежништвото и угостителството. Операцијата е спроведена како дел од европската иницијатива EMPACT, со цел разбивање на криминалните мрежи, заштита на жртвите и зајакнување на меѓународната соработка.