Северна Кореја ќе постави звучници за „психолошка војна“ на границата со Јужна Кореја

Северна Кореја подоцна овој месец ќе ги вклучи звучниците за „психолошка војна“ долж границата со Јужна Кореја, изјави Ким Јо Џонг, сестрата на севернокорејскиот лидер Ким Џонг Ун, пренесе ДПА.

Ким Јо Џонг го опиша овој потег како „соодветен одговор“ на наводните провокации на јужнокорејската војска, обвинувајќи ја дека на најмалку две места испукала предупредувачки истрели, при што го опиша Сеул како „најодвратниот и најодбивниот непријател на светот“. Военото раководство на Јужна Кореја засега не ги коментираше овие обвинувања.

Двете Кореи во минатото користеа системи со звучници за емитување политичка пропаганда преку силно милитаризираната граница за да влијаат врз населението од другата страна, а Пјонгјанг повремено ги користеше овие системи и за намерно вознемирување на жителите во пограничните области со гласна бучава.

Односите меѓу двете земји и натаму се напнати, а Северна Кореја неодамна повторно спроведе серија ракетни тестирања. На 21 септември тројца јужнокорејски војници беа повредени, некои од нив тешко, во експлозија предизвикана од севернокорејски нагазни мини, покажуваат резултатите од истрагата на јужнокорејската војска, додека Пјонгјанг ги отфрли овие обвинувања. Двете земји формално и натаму се во војна, бидејќи Корејската војна (1950–1953) заврши само со примирје, а двете држави сè уште немаат потпишано мировен договор.