Русија нема да ѝ дозволи на Украина сериозно да ја наруши активноста на цивилната авијација

Русија нема да ѝ дозволи на Украина сериозно да ја наруши активноста на цивилната авијација и покрај заканата на украинскиот претседател Володимир Зеленски, изјави денеска рускиот министер за транспорт Андреј Никитин.

Зеленски вчера ги предупреди авиокомпаниите и осигурителните компании дека присуството на украински дронови го направило опасен за користење рускиот воздушен простор, кој според него фактички е затворен.

– Секако, ние се подготвуваме за ова и ги земаме предвид сите овие закани. Постојано ги подобруваме барањата за безбедност на летовите и сигурноста на аеродромите и имаме решенија за сето ова. Имаме решенија за сите закани што ги изрекуваат терористите – изјави Никитин.

Рускиот претседател Владимир Путин вчера изјави дека предупредувањето на Зеленски звучело како Украина да има намера да изврши „државен тероризам“. Москва ќе најде начин да реагира доколку тоа се случи, додаде тој.

Путин вчера исто така призна дека украинските напади со дронови оштетиле околу 100 руски бродови, но рече дека Киев не ѝ нанесол на земјата „штета од критично значење“.

– Мислам дека ни нанесоа реална штета – призна Путин пред медиумите во киргистанската престолнина Бишкек. „Загинаа луѓе, морнари, вклучувајќи и странци“, додаде тој и посочи дека меѓу убиените има граѓани на Азербејџан и Турција.

Путин рече дека прелиминарните проценки ја ставаат вкупната штета нанесена од досегашните напади на околу 1 процент од бруто домашниот производ на Русија. „За нас тоа не е штета од критично значење“, истакна тој.

Украина изведуваше напади врз нафтени танкери и бродови со жито во Црното Море и соседното Азовско Море како дел од својата кампања против Русија. Покрај тоа, Киев значително ги зголеми нападите со дронови со долг дострел длабоко во територијата на Русија, повеќекратно напаѓајќи ги нафтените рафинерии и логистичките центри.

Путин изјави дека заштитата на руските рафинерии била значително подобрена. Претходно, компаниите се жалеа дека руската држава не успеала да ја загарантира нивната безбедност и покрај повеќекратните уверувања од претседателот.

Украина се стреми да ѝ нанесе штета на руската економија и да ѝ го отежне на Москва финансирањето на нејзините воени напори. Путин ги повтори коментарите од неодамнешно интервју, обвинувајќи го Киев дека ја „отворил Пандорината кутија“ со нападите и се закани со уште поразурнувачки руски воздушни напади како одговор.