Албанија: Пожар од големи размери се шири кај Валона, за 24 часа 34 пожари

Пожарот во Шашица, на околу осум километри од албанскиот приморски град, Валона, продолжува да се шири на големи површини.

– Поради пожарот што се наоѓа на одредена оддалеченост од каменолом, четворица работници  останале на работните место за да ги заштитат алатките и опремата. Но, заради зголемената опасност, од работниците е побарано да ја напуштат областа, објави Албанската новинска агенција (АТА).

Противпожарно возило се упати кон нив за да ги евакуира од местото и да се избегне каква било опасност по нивните животи.

– Интервенцијата ја отежнува силниот ветер и недостапниот терен, засега нема опасност по станбените објекти. Надлежните служби ја следат ситуацијата и работат на спречување на ширењето на пожарот, наведува АТА.

Министерството за одбрана  објави дека во изминатите 24 часа, на територијата на земјата се регистрирани 34 пожари, од кои пет активни, а четири се под надзор. Во пожарот кој избвнал во текот на ноќта и се уште е активен во селото Линај, Голема Малесија, изгореле неколку ненаселени куќи.

– Вкупно 219 оперативни сили и 35 противпожарни возила се ангажирани во операциите за справување со ситуацијата. Вооружените сили ги поддржаа операциите со 60 лица, еден хеликоптер и два авиони „Ер Трактор“, соопшти албанското МО.