Романија со најголем раст на цените на горивата во ЕУ во јули, Романците сè почесто точат во Бугарија

Романија во јули забележа најголем годишен раст на цените на горивата меѓу сите земји членки на Европската Унија, со скок од 24,2 проценти, што е значително над просекот во ЕУ кој изнесува 16,9 проценти.

По Романија, најголемо поскапување бележат Германија и Литванија со раст од по 22,9 проценти, додека Бугарија се наоѓа на следното место со годишно зголемување од 22,2 проценти.

Главни надворешни причини за ваквиот раст на цените се нестабилноста на светските нафтени пазари и глобалните нарушувања во снабдувањето. Како последица на тоа, сегашните цени на бензинските станици се дури и повисоки во споредба со периодот на енергетската криза од јуни 2022 година.

Во моментов, романските возачи плаќаат повеќе за гориво од оние во Бугарија и Унгарија, објави романската телевизија „Диџи24“. Поради тоа, Романците кои патуваат кон бугарското или грчкото крајбрежје сè почесто претпочитаат да ги полнат резервоарите во Бугарија.

За споредба, додека во јули дизелот во Романија се продаваше за 9,92 до 9,98 леи (1,90 до 1,91 евро) за литар, а бензинот за најмногу 9 леи (1,72 евро), според проверката на БТА, цените во моментов се дополнително зголемени:

Бензин: меѓу 9,51 и 9,57 леи (1,81 до 1,82 евро) за литар.
Дизел: меѓу 10,14 и 10,40 леи (1,93 до 1,98 евро) за литар.
Тоа значи дека полнењето на еден резервоар од 50 литри во Романија сега чини околу 510 леи, односно 97 евра.

Во обид да ги ублажи последиците од ова поскапување, романското Министерство за финансии на 16 август ја намали акцизата за обичниот дизел за 20 проценти, но засега оваа мерка сè уште нема дадено забележлив ефект врз крајните цени на пумпите.