Трамп изјави дека севернокорејскиот лидер Ким Џонг-ун реагирал на неговите пријателски гестови

Само еден ден откако му наложи на Пентагон „значително да ги намали заедничките воени вежби со Јужна Кореја“ и ја нарече Северна Кореја „незаканувачка и полна со почит“, американскиот претседател Доналд Трамп истакна дека севернокорејскиот лидер Ким Џонг-ун реагирал на неговите пријателски гестови.

На прашањето од новинарите во Овалната соба зошто Ким се уште не одговорил на неговите напори за обновување на дијалогот, Трамп кратко одговори: „Па, одговори“, без да даде дополнителни детали.

Трамп во неделата му наложи на Пентагон „значително да ги намали заедничките воени вежби“ со Сеул, образложувајќи го тоа со одбивањето на Јужна Кореја да учествува во американските дејствија против Иран.

Северна Кореја ги осудува заедничките воени вежби на САД и Јужна Кореја, оценувајќи ги како подготовка за војна.

Јужнокорејскиот претседател, Ли Џе-мјун, денеска изјави дека заедничките воени вежби со САД се исклучиво одбранбени и дека силниот сојуз меѓу двете земји и независната национална одбрана се меѓусебно дополнувачки.