Европски организации за спасување пријавија најмалку 21 смртен случај на мигрант во Средоземното Море

Европските организации за спасување денеска пријавија најмалку 21 смртен случај на мигранти во изминатите денови во централниот Медитеран, јави ДПА.

Италијанската организација „Имрџенси“ пронајде седум тела на преоптоварен брод и спаси 57 лица. Според организацијата, двајца од спасените биле во критична состојба.

Мигрантите испловиле од либискиот крајбрежен град Зуара со дрвен брод. Според организацијата, спасувачката операција била спроведена во меѓународни води, но во либиската зона за пребарување и спасување, за која е одговорна Либија. Либиските власти се уште не дале коментар за темата.

Одделно, германската организација „Си Воч“ соопшти дека нејзините извидувачки авиони, заедно со германската организација „Спасувачки брод“, пронашле три тела во Средоземното Море во текот на викендот.

Европската организација за спасување „СОС Медитеран“ соопшти дека пронашла 11 тела во водата покрај либискиот брег во петокот.

Централниот Медитеран останува најсмртоносниот миграциски воден пат кон Европа, забележува ДПА. Според Меѓународната организација за миграција (ИОМ), најмалку 872 лица загинале или се пријавени како исчезнати во тамошните води од почетокот на годината.