Не ја прифаќаме неконтролираната имиграција: Премиерките на Италија и Данска бараат заштита на европските христијански вредности

Премиерките на Италија и на Данска, Џорџа Мелони и Мете Фредериксен, денеска објавија изјава насловена „Заедничка порака за Европа“, во која ја претставуваат својата заедничка визија за иднината на европскиот континент, безбедноста на европските граѓани и потребата од заштита на европските вредности и европскиот начин на живот.

На почетокот на изјавата, Мелони и Фредериксен признаваат дека потекнуваат од различни политички семејства со многу различни политички ставови и дека сигурно не се согласуваат за сите прашања, но ги нагласуваат своите допирни точки.

„Ние двете сме единствените жени кои раководат со влади во земјите на ЕУ. Едната од нас раководи со голема земја од Југот, а другата со мала земја од Северот, но нè обединува желбата да ја браниме Европа“ – наведуваат тие.

„Не ја прифаќаме неконтролираната имиграција кон Европа и водиме строга миграциска политика и во нашите земји и во Европа. Никој не може да го негира негативното влијание на нелегалната имиграција врз нашите општества, што доведува до зголемување на криминалот, зголемен притисок врз јавните услуги и ерозија на довербата на граѓаните“ – нагласуваат Фредериксен и Мелони.

– Особено сериозно е кога нелегални мигранти, кои немаат право да останат во нашите земји, вршат тешки кривични дела, трговија со дрога или сексуално насилство, додаваат тие.

– Сосема е разбирливо европските граѓани да очекуваат конкретни активности од своите политички претставници. Предолго време, особено обичните луѓе, плаќаа превисока цена поради неконтролираната имиграција. Наша должност е да продолжиме решително да работиме на обезбедување конкретни одговори за граѓаните, особено за најранливите, и да гарантираме поголема безбедност и заштита за нашите заедници, истакнуваат премиерките на двете земји.

Тие потсетуваат дека со заеднички напори успеале да ја променат рамнотежата во примената на Европската конвенција за човекови права во однос на странски државјани кои вршат тешки кривични дела и дека, како резултат на таа промена, сега би требало да се зголеми бројот на протерувања.

Покрај тоа, тие наведуваат што уште може да се направи во Европа.

„Мора да се создадат центри за враќање на мигранти во трети земји, како и да се применуваат други иновативни решенија надвор од Европа. Интензивно работиме на ова прашање“ – се наведува во нивната изјава.

Според Мелони и Фредериксен, тоа нема да биде доволно.

– Почитувањето на нашите закони мора да оди рака под рака со почитувањето на европските вредности. Ова се однесува и на нелегалните мигранти и на милионите странски државјани кои легално живеат во нашите земји и низ Европа, нагласуваат тие.

„Двете сме горди на христијанското културно наследство на Европа и сакаме да го заштитиме. Од оние кои доаѓаат во нашите земји и ја избираат Европа за свој нов дом очекуваме да ги почитуваат нашите вредности и да не се обидуваат да ни наметнуваат модели на живот што не ги споделуваме. Сметаме дека тоа е вистинскиот пат за заштита на Европа и на нашите заеднички вредности. И веруваме дека милиони Европејци го споделуваат ова уверување“ – заклучуваат двете премиерки во изјавата.

Изјавата е објавена набрзо по миграциската криза во Сеута и во услови на тензии меѓу Италија и Шпанија што таа ги предизвика. Таа е објавена и во момент кога земјите членки на ЕУ ја разгледуваат можноста за отворање центри во трети земји, надвор од ЕУ, во кои би биле испраќани мигранти на кои им е одбиено барањето за азил или правото на престој на европска територија.

Џорџа Мелони е лидерка на десно-конзервативна партија, додека Мете Фредериксен е социјалдемократка. Двете, сепак, ја делат строгата политика во миграциските прашања, потсетува италијанската агенција АНСА.