Вадефул го повика Путин да почне мировни преговори за Украина

Германскиот министер за надворешни работи, Јохан Вадефул, го повика рускиот претседател Владимир Путин да се вклучи во преговори со цел да се стави крај на војната во Украина и порача дека Европа мора да биде вклучена во секое евентуално решение.

Говорејќи во Мексико Сити заедно со својот мексикански колега Роберто Веласко, Вадефул изјави дека конфликтот достигнал фаза во која напорите за обезбедување на договорен крај на конфликтот стануваат сè поитни, јави ДПА.

Неговите коментари следуваа откако украинскиот претседател Володимир Зеленски, во услови на застој во медијаторските напори предводени од САД, објави отворено писмо во кое нуди директни мировни преговори со Путин.

Вадефул истакна дека Германија и Европската Унија ќе мора да бидат вклучени во секакви преговори, аргументирајќи дека клучните прашања како што се безбедносните гаранции за Украина и патот на Киев кон членство во ЕУ можат да се разгледуваат само со европско учество. Тој додаде дека форматот и тајмингот на таквото вклучување можат да се одредат во кој било момент.