ЕУ ќе ја поддржи армијата на Либан со 100 милиони евра

Европска Унија ќе обезбеди дополнителни 100 милиони евра за финансиска поддршка на армијата на Либан, која дејствува во услови на кревко примирје, изјави висока претставничка на ЕУ за надворешна политика и безбедност, Каја Калас.

– Најдобриот начин да се намали заканата што ја претставува Хезболах е да се зајакне либанската држава, да се зајакнат нејзините институции и да се врати нејзиниот монопол врз употребата на сила, објави Калас на платформата Икс.

Таа истакна дека новиот договор за прекин на огнот помеѓу Израел и Либан е можност за запирање на целосен воен судир.

– Но, смртта на мировник на УНИФИЛ и континуираните престрелки ја нагласуваат кревката природа на она што беше договорено, истакна Калас.