За Трамп одлуката на Врховниот суд во Мисури е „мрачен ден за правдата“

Американскиот претседател Доналд Трамп денеска ја осуди одлуката на Врховниот суд на Мисури да ја блокира новата конгресна изборна мапа, велејќи дека тоа е мрачен ден за правдата во државата.

„Врховниот суд на Мисури, на смешен начин, одлучи да ги врати изборните мапи во онаа состојба што ја имаше одамна. Тоа е древна историја!“, напиша Трамп на социјалната мрежа Truth Social.

Претседателот Трамп додаде дека одлуката е „ужасна, смешна и неуставна“ и дека можеби нема да има доволно време повторно да се промени мапата пред изборите.

„Ова е мрачен ден за ’правдата’ во Мисури!“, напиша тој.

Државната обвинителка на Мисури, Кетрин Ханавеј, објави дека ќе ја оспори одлуката пред Врховниот суд на САД, велејќи дека таа го крши федералниот закон и ја довела државата во „целосна уставна криза“.

Гувернерот на Мисури, Мајк Кехо, републиканец кој ја поддржа новата мапа, исто така ја критикуваше одлуката, велејќи дека е разочаран од постапките на „неизбраните судии“.

Новата изборна мапа е дел од пошироката републиканска кампања за прецртување на конгресните окрузи пред ноемвриските избори, со кои партијата се стреми да ги зголеми своите шанси за задржување на тесно мнозинство во Претставничкиот дом.

Врховниот суд на Мисури пресуди дека новата мапа не може да стапи на сила без одобрение од гласачите на референдум во ноември, па затоа за претстојните избори ќе се користат претходните граници на окрузите.