Мицкоски: Од ограбена држава клекната на колена, за три години направивме подобро место за живеење

Од клекната, ограбена и распадната држава којашто пред 26 месеци ни беше главен предизвик, а ја наследивме од претходната влада на СДСМ и ДУИ, денеска можеме да кажеме дека Македонија после три години е подобро место за живеење. Јас ви гарантирам дека за три години ќе биде уште подобро место за живеење од денеска, рече денеска премиерот Христијан Мицкоски. 

Тој при промоцијата на нови комунални возила за општините истакна дека изминатите 26 месеци се бореле со распаднати и уништени институции, со ограбена држава која била клекната на колена.

– Завршувавме проекти коишто беа започнати и заборавени, градевме експресни патишта, делници од пруга и продолжуваме да градиме експресни патишта и делници од пруга. ​Продолживме со автопатските секции, отпочнуваме нови автопатски секции. Бевте сведоци пред некој ден на една таква нова автопатска секција којашто ја почнавме, следниот месец ќе ставиме камен темелник и на уште една друга автопатска секција, потенцира премиерот.

Додаде дека во овој период реконструирале болници и го поправале уништеното од претходната влада во здравството, како и последиците од криминални политики кога, како што истакна, бевме држава којашто беше буквално на дното.

– Ограбени граѓани, уништена, девастирана економија со погрешни економски политики, прогресивни даноци, солидарни даноци и што ли не се правеше периодот кој сите ние брзо сакаме да го заборавиме. Но, дојде влада којашто се зафати веднаш за работа и да го коригира сето она што беше оставено од претходната, би рекол, криминална влада на СДСМ и ДУИ. ​Еден од водечките проекти на почетокот на оваа влада беше децентрализирање на средства од државниот буџет кон општините и на тој начин успеавме да обезбедиме проекти од половина милијарда евра коишто се децентрализираа од централниот буџет кон општините за капитални инвестиции, истакна Мицкоски.

Тука, нагласи, не застанале туку продолжиле да соработуваат и натаму со општините.

– ​Еден од проектите со коишто со коишто можеме исто така да се пофалиме е и овој проект денеска којшто го претставуваме за подобра животна средина, за поголема хигиена во нашите општини. Им честитам на сите оние коишто ќе добијат нова механизација, нови алатки да се справуваат со сметот. Повикувам и на општествена одговорност и на граѓанска одговорност, затоа што нашата животна средина, е наша животна средина и треба да си ја чуваме сите поддеднакво да бидеме одговорни кон неа, рече премиерот Мицкоски. 

Според него, следниот чекор е испораката на автобусите коишто би требало многу скоро да почнат да се испорачуваат до општините за организирање на еколошки јавен градски превоз,истакнувајќи дека тука мисли на електричните автобуси.

Тој изрази благодарност на колегите од Владата, на заменикот претседателот на Влада и министер за транспорт Алаксандар Николоски, на заменичката во Министерството за транспорт, на градоначалниците, на директорката на Светска банка во регионов, но, како што рече, и на сите оние коишто ги поддржуваат овие проекти.

– Јас сум убеден дека во периодот којшто следи ќе продолжиме да го испорачуваме сето она што го ветивме пред граѓаните. Знам дека тешко се живее, впрочем и никогаш не било полесно, но ние сме тука да го ставиме срцето на терен и да направиме сѐ што е во наша моќ да го подобриме животот на граѓаните преку проекти како овој. Сигурен сум и убеден сум дека тоа ќе се стори, потенцира премиерот Мицкоски.