Тошковски: 9 прекршоци регистрирал „Безбеден град“ на првиот ден од кога е апдејтиран за мотоциклисти

Примарната цел на Министерството за внатрешни работи при примената на паметниот систем „Безбеден град“ е неселективно и професионално постапување со цел спасување човечки животи во сообраќајот- истакна министерот за внатрешни работи Панче Тошковски денеска одговарајќи на новинарско прашање во врска со вклучувањето на моторите во опсегот на „Безбеден град“.

Одговарајќи на новинарско прашање за ефективноста на техничките контроли и изречените санкции, Тошковски нагласи дека МВР во изминатиот период работело на надминување на повеќе технички и системски предизвици.

– Многу е битно да знаеме дека она што го работи Министерството за внатрешни работи во изминатите две години е насочено кон првично неселективно, професионално, максимално употребувајќи паметни системи и исклучувајќи го човечкиот фактор, со една и единствена цел, работење и во делот на сообраќајот, а тоа е еден човечки живот плус во споредба со претходно – изјави Тошковски.

​Тој потсети дека првично биле лоцирани и решени проблемите со црните точки во однос на поставувањето на камерите, особено на подрачјето на Скопје, по што следувало и успешно решавање на детекцијата на странските возила. ​

– Потоа имавме проблем со детектирање на странците затоа што тие не беа дел од оној систем што пред една година беше за нашите граѓани, кои при регистрирање на возилото ги даваат податоците потребни за да можеме да го направиме тој регистар. Покажавме дека можеме да го решиме и за нив – да, имаше мали проблеми на почетокот, но еве сега повеќе не е тема, како што не е тема ни метежот со пасошите, така не е тема ни метежот на границите, во делот на изрекување сообраќајни прекршоци што се изрекувани сега и кон странците – додаде министерот.

​Во однос на детекцијата на прекршоците кај мотоциклистите, Тошковски појасни дека станувало збор за специфичен технички проблем поради позицијата на регистарските таблички.

– Проблем беа мотористите и сите оние што јас ги нарекувам оние што глумат дека се моторџии бидејќи вистинските моторџии ги почитуваат сообраќајните правила, носат кацига… имавме технички проблем како да ги детектираме при еден од прекршоците што ги детектираме автоматски, а тоа е брзината. Зошто? Од едноставна причина што камерата за брзина детектира предна шасија, предна страна на возилото, а регистрацијата е на задната страна на моторот  – посочи Тошковски.

​Според него, со поставувањето на соодветната опрема на клучните локации веќе се бележат првите резултати.

​- Го решивме и на дел од територијата на Македонија, каде што првично сметавме дека има најдобри услови да се постават, ги поставивме и мислам дека, ако не се лажам, првиот ден имаме констатирано некаде 9 прекршоци за недозволена брзина од страна на оние што управуваат мотор и мислеа дека нема да може да бидат предмет на детекција од овој паметен систем „Безбеден град“, кој искрено да кажам многу ме радува затоа што покажа дека како дел од еден систем си ја врши работата –  заклучи тој.

Нагласи дека „Безбеден град“ дал резултати, особено во делот на намалување на бројот на жртвите во сообраќајни незгоди, при што направи споредба оваа и минатата година и нагласи дека во 2025 заклучно со 1 септември имало 96 жртви, а оваа година во истиот деветмесечен период имало 60 жртви. 

– И до сите македонски државјани и странци што транзитираат низ Македонија, а ги почитуваат сообраќајните правила, секој од нив е учесник во делот на спасувањето човечки животи. Огромна лична благодарност до сите вас – рече министерот.

Во однос на тоа кога ќе се казнуваат странски државјани што не ги почитувале сообаќајните правила и на други гранични премини, покрај Табановце, Тошковски рече дека тоа е предвизик за следниот период, со возможно техничко решение, со цел повторно да не се случат непредвидените ситуации како тие на Табановце.

– На Табановце имавме, како да кажеме, погрешна процена уште од почеток. Имавме процена дека ќе има по пет возила на час, а имавме по 500 возила на час. И тука сме на курсот. Така што, не сакаме истото тоа да се случи и со другите. Ќе гледаме максимално добро да се организираме, да немаме дополнителен товар за странците што транзитираат низ Македонија за најбргу што може да го регулираат она што се должни да го регулираат при влез во државата – рече министерот.