Ѓорѓиевски: Од паднатите дрвја на Водно – изграден нов моторички парк

Силното невреме што го зафати Скопје остави зад себе големи штети и бројни паднати дрвја. Но, нашата обврска не е само да ја санираме направената штета, туку од секој предизвик да создадеме нешто корисно, трајно и вредно за граѓаните. Како што најавив веднаш по невремето, здравите стебла од паднатите дрвја не ги оставивме да завршат како отпад туку им дадовме нов живот и нова намена.

Водно доби нова содржина наменета за движење, рекреација, дружење и создавање здрави навики кај сите генерации, објави градоначалникот на Скопје Орце Ѓорѓиевски.

-Од нив го изградивме новиот моторички парк на Водно – внимателно уреден простор со природни препреки и реквизити за развивање на рамнотежата, координацијата, агилноста, прецизноста и физичката подготвеност. Простор во кој децата преку игра ќе ги развиваат своите моторички способности, а младите и возрасните ќе можат да вежбаат, да се рекреираат и да поминуваат повеќе квалитетно време во природа, наведува тој во објавата на Фејсбук.

Додава дека наместо отпад, создадале нова вредност, а наместо уништени стебла, создале простор исполнет со движење, енергија и живот.

Истакна дека вакви паркови ќе добијат и Парк шума Гази Баба и Сарај, на местата каде што беа отстранети паднатите дрвја веќе се засадуваат нови садници, а во втората половина на септември ќе се започне со голема есенска акција за пошумување на нашиот град.

-Ова е само дел од активностите со кои му го враќаме сјајот на Водно. Го реконструиравме патот до средно Водно. Ги уредуваме патеките и ја обновуваме урбаната опрема, која со години беше оставена на забот на времето. Истовремено, на Водно и Матка веќе функционира Планинската спасителна служба, подготвена за брзи и професионални интервенции во планински услови. Со тоа ја подигнуваме безбедноста на сите посетители и создаваме услови безгрижно да уживаат во природата, посочи Ѓорѓиевски.

Истакнува дека Водно е срцето и зелените бели дробови на Скопје и оти го чуваме, го обновуваме и го развиваме паметно, одговорно и со љубов.

-Чекор по чекор, создаваме Водно какво што заслужуваат скопјани – безбедно, уредено, зелено и исполнето со содржини за сите генерации, додава Ѓорѓиевски во објавата на Фејсбук.