Русија изгради 10 тајни бази за дронови долж границите со Украина и Белорусија, објави „Телеграф“

Русија изградила десет тајни бази во близина на своите западни граници, кои планира да ги користи за изведување напади со беспилотни летала на реактивен погон врз цели во Украина и потенцијално врз земјите-членки на НАТО, покажува истражувањето на британскиот весник „Телеграф“.

Врз основа на протечени документи и анализи на сателитски снимки, весникот идентификувал најмалку 59 лансирни шини — механички катапулти што се користат за полетување на дронови со фиксирани крила наместо традиционална писта — поставени долж граничната линија со Белорусија и Украина, пренесува Укринформ.

Дел од овие центри се пренаменети од поранешни воени бази и цивилни аеродроми, додека дополнителни лансирни локации се изградени од темел во рурални подрачја. Податоците од изворите со отворен пристап покажуваат дека седум од десетте идентификувани објекти веќе биле активни за време на некои од неодамнешните напади врз Киев.

Според истражувањето, Москва забрзано ги модернизира своите верзии на иранскиот дрон „Шахед“ — попознати како „Геран-4“ и „Геран-5“ — распоредувајќи понови, високобрзински варијанти со реактивен погон и боеви глави до 90 килограми, кои се способни да погодат цели на оддалеченост од речиси 1.000 километри.

Анализата на сателитските снимки, направена во соработка со австралиската компанија за кибербезбедност и извидување со дронови „ДронСек“ (DroneSec), покажа дека околу 20 од новопоставените шини се со продолжена конструкција. Ова укажува дека тие се наменети за полетување на најновите руски дронови за напади на големи оддалечености.

Снимките откриваат и значително проширување на складишниот капацитет, при што во една од базите има простор за сместување на повеќе од 1.000 дронови одеднаш. Во исто време, на повеќе клучни објекти продолжува изградбата на дополнителни лансирни позиции.

Воените аналитичари предупредуваат дека оваа технологија што брзо се развива би можела да биде насочена и кон Европа во случај на ескалација, бидејќи локацијата на дел од базите им овозможува на најмоќните руски дронови да достигнат до Варшава, а според графичкиот приказ на „Телеграф“, во овој радиус влегува и источниот дел на Македонија.

Сепак, весникот подвлекува дека засега нема директни докази дека Москва подготвува непосреден напад врз Варшава или друга членка на Алијансата, туку дека мрежата се користи за одржување постојана закана за НАТО.