Активни паркови за сите генерации: Пет нови фитнес зони ќе се постават во Аеродром

Аеродром добива нови простори за спорт, рекреација и активен живот. Во паркот „Патрик“ поставена е првата од вкупно пет нови фитнес зони што Општина Аеродром ги планира за оваа година, со што продолжуваат активностите за создавање современи и достапни услови за физичка активност на отворено.

Во следниот период нови фитнес зони ќе бидат поставени и во Острово, Ново Лисиче, Тодор Чангов и Долно Лисиче, со што граѓаните од повеќе населби ќе добијат можност за вежбање во непосредна близина на своите домови.

Фитнес зоните се опремени со систем на справи наменети за калистеника и вежбање на отворено, кои овозможуваат различни видови физичка активност и можат да ги користат граѓани од различни возрасни групи и со различно ниво на физичка подготвеност.

„Сакаме Аеродром да биде општина во која активниот и здравиот начин на живот ќе биде достапен за сите. Со поставувањето на новите фитнес зони создаваме места каде што граѓаните можат бесплатно да вежбаат, да се рекреираат и да поминуваат поквалитетно време во својата населба. Особено ми е важно што овие содржини се наменети за сите генерации – од младите, до повозрасните граѓани кои сакаат да останат физички активни. Продолжуваме да инвестираме во јавни простори кои поттикнуваат повеќе движење, поздрави навики и поквалитетен живот за нашите граѓани“, изјави градоначалникот на Општина Аеродром, Дејан Митески.

Со новите фитнес зони Општина Аеродром продолжува со уредување и збогатување на јавните простори, создавајќи услови за повеќе движење, повеќе рекреација и поздрави животни навики.

Целта е парковите и јавните површини во сите населби да станат уште пофункционални и поатрактивни места за активно поминување на слободното време – за деца, млади, возрасни и повозрасни граѓани.

Продолжуваме да го градиме Аеродром како активна, здрава и современа општина за сите генерации.