Водата во Гостивар е безбедна за пиење, членовите на кризниот штаб се напија од чешма

Жителите на Гостивар од денеска повторно можат безбедно да ја користат водата од градскиот водовод за пиење и подготовка на храна.

Одлуката следува откако последните анализи покажале дека водата е микробиолошки и бактериолошки исправна, со што се исполнети условите за укинување на забраната за нејзино користење за пиење. Ова го потврдија надлежните институции, а информацијата ја соопштија и од Главниот штаб за управување со кризи.

Водата во Гостивар беше забранета за пиење од 17 јули, по утврдено загадување на водоводниот систем. Во периодот што следеше, беа спроведувани повеќе испитувања и мерки за прочистување и дезинфекција на системот.

Според надлежните, безбедноста е потврдена по три последователни примероци во кои не биле пронајдени бактерии.

Сепак, на граѓаните им се препорачува пред повторно да ја користат водата за пиење, добро да ги истечат чешмите, како дополнителна мерка на претпазливост.

Со ова, по речиси еден месец, се укинува една од најсериозните мерки поврзани со водоснабдувањето во Гостивар, а граѓаните повторно добиваат можност да ја користат водата од водоводната мрежа за секојдневна употреба.