Медузи сериозно влијаат врз најголемата нуклеарна централа во Франција

Медузи сериозно влијаат врз работата на најголемата нуклеарна централа во Франција во Гравелин, на северниот крај од Ламанш, соопшти операторот „Électricité de France“ (ЕДФ).

Три реактори се целосно исклучени, додека друг работи само делумно. Бидејќи еден од шесте реактори е на одржување, во моментов само еден реактор работи нормално.

ЕДФ увери дека ситуацијата не претставува никаков безбедносен ризик за централата, нејзиниот персонал или животната средина. Компанијата не соопшти точно каде медузите испливале на брегот ниту како го нарушиле функционирањето на централата.

Централата се бореше со медузи и минатата година, кога големи количини завршија во филтрациските системи на пумпните станици. Реакторите ја продолжија работата по прекинот што траеше неколку дена.

Гравелин е една од речиси 20-те нуклеарни централи во Франција. Се наоѓа на северниот француски брег, приближно на половина пат помеѓу Кале и Денкерк, пренесе ДПА.