Вучиќ не е коцкар и се стреми кон „сценариото на Путин“

Фајненшл тајмс

Александар Вучиќ можеби ги користи оставката и најавите за избори за да ја тестира политичката клима и може да се откаже од своето ветување да се повлече ако смета дека времето не е поволно, пишува Фајненшл тајмс

Сојузникот на Трамп, Александар Вучиќ, планира да се повлече од функцијата претседател на Србија и да се врати на власт како премиер по вонредните избори оваа есен, следејќи го моделот инспириран од рускиот лидер Владимир Путин, пишува Фајненшл тајмс.

Весникот наведува дека Вучиќ, „56-годишен моќник кој управува со Србија во последните 13 години, во различни капацитети, се соочува со растечки протести и незадоволство поради наводните авторитарни тенденции, корупцијата и бавниот економски развој“.

Фајненшл тајмс проценува дека српскиот лидер е еден од ретките преостанати сојузници на американскиот претседател Доналд Трамп во Централна и Источна Европа.

Вучиќ усвои дел од реториката на движењето MAGA, критикувајќи го Брисел, независните медиуми и елитите кои, како што тврди тој, имаат поддршка од странство, а во исто време промовирајќи конзервативни вредности како што се семејството, христијанството и спротивставувањето на родовата политика.

Исто така, се додава, Србија го отвори патот за луксузен проект поддржан од зетот на Доналд Трамп, Џаред Кушнер, на локацијата на Министерството за одбрана на поранешна Југославија во Белград, кое беше бомбардирано од НАТО во 1999 година и се смета за национален споменик.

Проектот подоцна беше повлечен по јавното негодување и истрагите за наводни неправилности, вклучително и тврдењата дека документите биле фалсификувани за отстранување на заштитата на културните споменици.

Повикувајќи се на проценките на аналитичарите, ФТ пишува дека Вучиќ можеби ја користи оставката и најавите за избори за да ја тестира политичката клима и дека би можел да се откаже од своето ветување да се повлече ако смета дека времето е неповолно.

„Ова не е прв пат да фрла мамка“, рече Хелена Иванов, истражувач во Друштвото Хенри Џексон во Лондон.

Потсетувајќи се дека пред неколку месеци Вучиќ изјави дека во јули би можеле да се одржат вонредни избори и дека би можел да се кандидира за премиер, аналитичарот заклучува дека Вучиќ се чини дека се стреми кон „сценариото на Путин“, со аргумент дека веќе го прекршил српскиот устав, во кој претседателската функција е претежно церемонијална, со тоа што продолжува да доминира во јавниот живот преку владејачката партија СНС.

„Клучно е што тој ја држи власта… Во партијата и во земјата… па затоа ова не е негово попуштање на барањата на студентите. Ова само ја држи својата база во предизборен режим“, додаде таа.

ФТ додава дека студентското движење ветило дека ќе номинира кандидати на парламентарните избори, со што ќе стане единствениот кредибилен предизвикувач на СНС.

„Стратегија со висок ризик и голема добивка би била истовремено да се одржат претседателски и парламентарни избори“, рече еден соговорник запознаен со политичката ситуација во Белград. Но, додаде тој, „Вучиќ не е коцкар“.

„Опција со низок ризик би била да се одржат претседателски избори само кога ќе се обезбеди парламентарното мнозинство на СНС, а претседателската функција да се задржи барем до 2027 година“, додаде соговорникот на ФТ.