Владата на Србија издвои 1,8 милиони евра за Државната изборна комисија

Владата на Србија издвои 209,72 милиони динари (околу 1,8 милиони евра) од тековната буџетска резерва за Републичката изборна комисија (РИК), според одлука објавена во Службен весник.

Во документот потпишан од првиот потпретседател на Владата и министер за финансии, Синиша Мали, се наведува дека тие пари се одобрени „со цел да се обезбедат недостасувачките средства потребни за набавка на материјали за посебни намени“.

Средствата наменети за „материјал за посебни намени“ во претходните буџети на РИК достапни на интернет беа поврзани со техничките и логистичките потреби на изборен процес.

Во мај, РИК објави тендер за набавка на 10.000 гласачки кутии, спрејови за обележување на прстите на гласачите и УВ ламби, а сите три постапки беа отворени до 15 јуни. Проценетата вредност на тие тендери не беше објавена.

Српскиот претседател Александар Вучиќ објави дека „избори“ ќе се одржат „или во октомври или во ноември“, без да прецизира дали се однесува на парламентарни или претседателски избори.

За време на интервју за три провладини телевизиски медиуми, додаде дека на митингот на владејачката Српска напредна странка на 27 јуни во Белград, ќе зборува за сето ова, како и за тоа дали ќе биде кандидат за премиер.

Од СНС претходно неколкупати објавија дека сакаат Вучиќ да биде нивен кандидат за премиер на претстојните избори.