Гроси: Нападот врз НЕ Запорожје ги загрози принципите на нуклеарна безбедност

Генералниот директор на Меѓународната агенција за атомска енергија (МААЕ), Рафаел Гроси, денеска изјави дека нападот со беспилотни летала врз нуклеарната централа Запорожје е сериозен инцидент што ги доведува во прашање клучните принципи на нуклеарна безбедност.

Тој повика на прекин на нападите врз нуклеарните постројки со цел да се спречи ризикот од нуклеарна несреќа, пренесуваат руските медиуми.

„Нападите врз нуклеарните постројки се неприфатливи и мора да престанат со цел да се спречи многу реалниот ризик од нуклеарна несреќа, што не би му користело никому“, рече Гроси.

Генералниот директор на Росатом, Алексеј Лихачов, претходно објави дека украински борбен дрон вчера удри во зградата на машинската просторија на шестата единица на електраната и таму експлодирал.

Според раководството на нуклеарната централа, во експлозијата немало повредени или сериозни штети, технолошките процеси не биле нарушени, а нивото на зрачење останало во нормални граници.

Експертите на МААЕ кои престојувале во нуклеарната централа пронашле штети на надворешноста на зградата на машинската просторија.

За време на обиколката, на горните катови од зградата беше пронајдена оштетена метална покривка, како и остатоци од оптички кабел и остатоци на земјата.

Агенцијата изјави дека евидентираната штета е во согласност со последиците од напад со беспилотно летало.

Според руските обвинувања, дронот удрил во машинската сала на шестата енергетска единица и експлодирал на околу 10 метри од реакторот.

Лихачов рече дека дронот бил контролиран преку оптички кабел, што, како што рече, укажува дека нападот бил намерен.

МААЕ соопшти дека нејзините експерти потврдиле дека нивото на зрачење во нуклеарната централа останало нормално по вчерашниот напад.

Нуклеарната централа Запорожје се наоѓа во близина на градот Енергодар, на левиот брег на Дњепар, и со шест реактори од по еден гигават, таа е најголемата нуклеарна централа во Европа.

Од септември 2022 година, нејзините единици не произведуваат електрична енергија, а од април 2024 година се во режим на ладно исклучување.