Американската војска запре брод што се обиде да ја пробие блокадата на иранските пристаништа

Американската војска запре уште трговски брод што се обидуваше да ја пробие блокадата на иранските пристаништа, изјави денеска официјален претставник на Вашингтон.

Официјалниот претставник изјави дека товарниот брод „Лиан Стар“ со знаме на Гамбија во текот на изминатата ноќ ги игнорирал повеќекратните предупредувања од војската на САД додека се обидувал да влезе во иранско пристаниште.

Бродот бил онеспособен од американски авиони во Оманскиот Залив и сè уште е таму, рече официјален претставник, додавајќи дека американските сили не се качиле на него.

Американската војска запре вкупно шест бродови кои се обидуваа да ја пробијат блокадата, додека на еден му беше дозволено да продолжи да плови.

САД ја започнаа поморската блокада на 17 април како одговор на затворањето на Ормуската Теснина од страна на Иран, по војната во таа земја што започна на 28 февруари.

Американскиот претседател Доналд Трамп вчера се состана со советниците, но не одлучи дали да продолжи со договорот за продолжување на прекинот на огнот со Иран и повторно отворање на мореузот.

Техеран тврди дека договорот не е финализиран.