Илјадници луѓе во Австрија протестираат поради застој на клучната рута кон Алпите

Неколку илјади луѓе денеска се собраа на превојот Бренер за да протестираат против зголемувањето на сообраќајот по еден од најпрометните транспортни коридори во Европа што ги поврзува северна и јужна Европа, јави ДПА.

Демонстрантите во австрискиот град Матрај ам Бренер носеа транспаренти на кои пишуваше „Доста е“ и „Мир во долината“, повикувајќи на мерки за намалување на влијанието на товарниот транспорт врз заедниците во алпскиот регион.

„Сензационално е“, рече организаторот на протестот Карл Милштајгер, коментирајќи го бројот на демонстранти, пренесува германската агенција.

„Ова ќе влезе во тиролската историја“, додаде Милштајгер, раководител на блиската општина Грис ам Бренер.

Властите во Австрија и Италија ја затворија рутата Бренер за транзитен сообраќај до вечерните часови од двете страни на границата. Многу демонстранти пристигнаа со воз и велосипеди.

На возачите им се препорачува да избегнуваат непотребни патувања, а пристапот е ограничен главно на локален сообраќај.

Пожар на железницата северно од Верона, во Италија, денеска го прекина железничкиот сообраќај по должината на коридорот Бренер, предизвикувајќи дополнителни тешкотии во сообраќајот во регионот.

Италијанската државна железничка компанија објави дека штетата е предизвикана од непознати лица.

Некои демонстранти, исто така, го критикуваа доцнењето во планирањето на железничката линија за пристап во германската покраина Баварија, која треба да го намали застојот на автопатот по завршувањето на тунелот Бренер.

Според податоците од Асфинаг, компанијата што управува со автопатот, речиси 11 милиони автомобили и околу 2,5 милиони камиони го користеле автопатот со патарина во 2025 година.

Според пресметките на Здружението за екологија и транспорт (VCÖ), само минатата година речиси три пати повеќе камиони го преминале преминот Бренер отколку сите алпски транзитни рути во Швајцарија заедно, потсетува ДПА.