Во Делчево промовирана нова поштенска марка по повод 150 години од Разловечкото востание

Во Делчево синоќа беше промовирана нова поштенска марка со мотиви од Разловечкото востание по повод 150-годишнината од овој значаен историски настан, со што се оддава почит на разловечките востаници и нивната борба за слобода.

Поштенската марка е со номинална вредност од 48 денари, отпечатена во тираж од 6.000 примероци, а нејзин автор е дизајнерката Лариса Донев од Бирото за филателија при АД „Пошти на Македонија“.

На промоцијата беше истакнато дека ваквите изданија претставуваат траен споменик, кој го чува сеќавањето на македонските револуционери и ја негува културата на паметење.

На свеченоста беа доделени и промотивни примероци од марката, а градоначалникот Иван Гоцевски изрази благодарност за, како што посочи, достоинственото одбележување на јубилејот и значењето на Разловечкото востание како симбол на стремежот кон слобода.

Во рамките на одбележувањето беа доделени и награди од литературен конкурс организиран од ЈЛБ „Илинден“, при што признанија добија ученици и автори во повеќе категории.

Во пресрет на централната прослава по повод 150 години од Разловечкото востание беше одржана и научна трибина во организација на Општина Делчево и НУЦК „Никола Јонков Вапцаров“, на која учествуваа истакнати професори и историчари. На трибината беа презентирани историски аспекти, анализи и факти поврзани со Разловечкото востание, со цел продлабочување на научното проучување и зачувување на историската вистина.

Програмата за одбележување на јубилејот кулминира синоќа со концерт на Воениот оркестар на АРМ и настап на ансамблот на народни песни и игри „Танец“.

Денеска, одбележувањето на 150-годишнината од Разловечкото востание продолжува со планинарски марш до Разловци, како и со свечена програма кај санираниот Спомен-дом на Разловечкото востание. Пред присутните е најавено обраќање на повеќе владини претставници, меѓу кои и премиерот Христијан Мицкоски.