Нова: Државното обвинителство во Љубљана поднело обвинение против патријархот на СПЦ

Државното обвинителство во Љубљана на 12 јануари поднело обвинителен предлог против патријархот на Српската православна црква, Порфириј Периќ, поради обвинувања за малтретирање на работно место во случајот со свештеникот Жељко Лубарда, кој тврди дека бил изложен на долготраен притисок затоа што одбил лажно да сведочи, со цел да прикрие финансиски малверзации во црковната благајна.

Според документот на Окружното државно обвинителство во Љубљана од 10 февруари 2026 година, во кој имале увид од порталот Нова/рс, обвинението е поднесено против патријархот на Српската православна црква, Порфириј, кој во тоа време бил митрополит загрепско-љубљански, како и против Српската православна црква – Црковната општина Љубљана како правно лице.

Во одговор на барање на медиумот, словенечкото обвинителство потврди дека за тој случај е поднесено обвинение до Општинскиот суд во Љубљана против едно лице за злоупотреба на работното место, како и против едно правно лице за одговорност за истото кривично дело. Како што наведоа, дел од кривичната пријава против други лица во меѓувреме е отфрлена.

Според обвинителниот документ, случајот се однесува на периодот кога Порфириј бил на чело на Загрепско-љубљанската митрополија на СПЦ.

Поранешниот љубљански парохиски свештеник Жељко Лубарда тврди дека трпел долготраен и системски мобинг, бидејќи не сакал да молчи за, како што тврди, финансиските злоупотреби во црковната благајна.

Како што рече свештеникот Лубарда, Окружното државно обвинителство го поднело предлогот за обвинение на почетокот на јануари, а тој бил информиран за тоа на почетокот на февруари.

Според него, патријархот Порфириј веќе бил сослушан пред истражниот суд.

Лубарда истакнува дека, покрај Порфириј, обвинета е и Црковната општина во Љубљана, како правно лице, „одговорна за спроведување на неговите прогони“.

„Сега на судот е да ја потврди законитоста на обвинението и да го закаже почетокот на судењето, кое се очекува во наредните месеци“, рече Лубарда.

Обвинението се однесува на кривично дело злоупотреба на работното место согласно член 196 и 197 од Кривичниот законик на Република Словенија. Српската православна црква – Црковна општина Љубљана како правно лице е обвинета за истото кривично дело, со образложение дека кривичното дело е сторено во нејзино име и за нејзина сметка од страна на Порфириј како нејзин управител.