Би-Би-Си: Осум морнари загинаа, а илјадници останаа заробени поради иранските напади врз бродови

Додека Иран се заканува дека ќе продолжи да ги напаѓа бродовите во Ормускиот Теснец, околу 20.000 морнари остануваат заглавени на пловила во Персискиот Залив.

Би-Би-Си дознава дека досега се убиени осум морнари откако почна конфликтот, а уште тројца се водат како исчезнати како резултат на нападот врз товарниот брод под тајландско знаме, Mayuree Naree.

Состојбата на мажите и жените кои ги превезуваат стоките низ светот по морски пат ќе биде на врвот на агендата на состанокот на Меѓународната поморска организација на ОН закажан за следната недела.

Вонредниот состанок во Лондон беше свикан од Египет, Франција, Катар, Мароко, Обединетите Арапски Емирати и Обединетото Кралство.

Сепак, освен дипломатскиот притисок и соопштението со кое се осудува она што се случува, тешко е да се види какви мерки може да преземе ИМО. Нејзините прописи бараат бродовите да бидат „доволно и ефикасно екипирани“.

Така, додека ИМО се обидува да ги координира напорите за грижа за оние кои се заглавени на бродовите со резерви и пристап до интернет, тие остануваат лесни цели за понатамошни ирански напади, коментира британскиот медиум.