Мерц: Германија не гледа причина да ги олабави санкциите против Русија

Германија не гледа причина да ги олабави санкциите против Русија, изјави денеска германскиот канцелар Фридрих Мерц, нагласувајќи дека солидарноста со Украина мора да има предност и покрај притисокот од глобалните енергетски пазари.

– Доколку американско-израелската војна во Иран заврши брзо, ќе видиме и релативно брзо враќање кон нормализација на пазарите на нафта и енергија. Затоа, нема причина да се размислува за ублажување на санкциите против Русија – истакна Мерц.

Тој рече дека соочена со избор помеѓу санкции и солидарност, ставот на Германија е јасен, дека стои зад Украина и е подготвена да издржи таква фаза доколку е потребно.

Американскиот претседател, Доналд Трамп, синоќа изјави дека неговата администрација ќе се откаже од одредени санкции поврзани со нафтата со цел да ги намали цените, пренесе МИА.

Изјавата е дадена во време кога цените на нафтата растат откако САД и Израел го нападнаа Иран, а потрошувачите плаќаат сè поскапо гориво на пумпите, објави Си-Ен-Ен.

Трамп не прецизираше кои санкции ќе бидат укинати.

– Имаме санкции против некои земји. Ќе ги отстраниме тие санкции сè додека ситуацијата не се стабилизира – истакна тој.

Иран и Русија се меѓу земјите со најстроги санкции, а обете се богати со нафта.

Неодамна, Трамп ѝ одобри на Индија ослободување од забраната, дозволувајќи ѝ да увезува повеќе руска нафта, како дел од трговскиот договор со САД, кој предвидува намалување на купувањата на Индија од Русија.