„V“ формата на маиците – од практичност до украс

Иако денес изгледа како обичен моден детал, препознатливиот памучен триаголник под јаката на маиците и дуксерите некогаш бил клучен изум кој ја спасувал спортската опрема. Креаторот на содржини Алекс Ма, кој на ТикТок ги открива тајните на текстилната индустрија, во видео со над шест милиони прегледи ја објасни историската и практичната намена на овој детал.

Наречен „V-додаток“, овој елемент не е поставен случајно. Неговата историја започнува во 1926 година, кога американскиот бренд „Расел атлетик“ (Russell Athletic) направил револуција во американскиот фудбал. Дотогаш, играчите носеле волнени дресови кои биле тешки, неудобни и предизвикувале иритација кога ќе се натопеле со пот.

Компанијата го дизајнирала првиот памучен дрес, а триаголникот бил поставен на стратешко место – таму каде што потта најмногу се собира. Овој специфичен дел од ткаенината дејствувал како „сунѓер“ кој ја апсорбирал влагата од пределот на градите и вратот, спречувајќи таа да се прошири по целата маица.

Од практична алатка до естетски додаток Покрај менаџирањето на влагата, „V-додатокот“ имал и втора важна функција – еластичност. Бидејќи памукот во тоа време не бил толку растеглив како денешните материјали, овој додаток овозможувал јаката полесно да се прошири при облекување, без да го изгуби првичниот облик.

Сепак, Алекс Ма нагласува дека кај современата облека, овој детал ја изгубил својата намена. Денес тој најчесто е направен од истата ткаенина како и остатокот од маицата и служи исклучиво за естетика.

„Кај модерните маици овој дел повеќе не се растегнува ниту ја впива потта како некогаш. Некои брендови дури одат дотаму што само го сошиваат обликот во форма на буквата ’V’ без воопшто да додадат парче ткаенина, што е чист маркетиншки трик“, заклучува тој.