Отказот на Аморим може да го чини Јунајтед 15.9 милиони фунти

Трошоците на Манчестер Јунајтед поради отпуштањето на тренерот Рубен Аморим би можеле да достигнат 15,9 милиони фунти, објави денеска клубот од „Олд Трафорд“.

Аморим беше отпуштен од тренерската должност на 5 јануари, по само 14 месеци на функцијата, кратко откако даде провокативни коментари за неговата позиција во хиерархијата на Јунајтед.

Како што наведе клубот во својот најнов финансиски извештај, 6,3 милиони фунти се однесуваат на ангажирањето на Аморим од лисабонски Спортинг во ноември 2024 година, додека сумата од 15,9 милиони фунти го претставува максималниот потенцијален долг на Јунајтед кон Аморим и неговиот тренерски персонал.

Во документот не е наведено, но медиумските извештаи укажуваат дека конечната бројка вклучува фактори како што се дали и кога Аморим ќе најде нова работа.

Аморим беше наследен во тимот од Олд Трафорд од Мајкл Керик, а Јунајтед оттогаш се искачи на четвртото место на табелата во Премиер лигата.