Херцог му се заблагодари на Трамп и изрази надеж дека нападот ќе донесе „историски промени“

Израелскиот претседател Исак Херцог му се заблагодари на претседателот на САД Доналд Трамп, за воената операција против Иран, истакнувајќи дека таа акција е „храбра“ и оти се надева дека ќе донесе „историски промени“.

Херцог во својата изјава ја нагласи важноста на соработката меѓу Израел и САД и ја пофали одлуката да се спротивстават на Иран, кој го означи како „водечки светски државен спонзор на тероризмот“, пренесе Скај њуз. Тој исто така истакна дека Иран претставува сериозна закана за глобалната безбедност, со цел да стане држава со нуклеарно вооружување.

Во својата порака, претседателот на Израел изрази поддршка за израелската војска, како и за воените сили на САД кои учествуваат во операцијата. Тој исто така повика на подобра иднина за целиот Блиски Исток и светот.

Херцог укажа на одлучноста на израелскиот народ, нагласувајќи дека никој не може да го скрши нивниот дух. Во заклучокот, израелскиот претседател му се обрати и на народот на Иран, изразувајќи надеж дека наскоро ќе можат да доживеат подобра иднина и слобода.

– Стоиме заедно со нашите пријатели и сојузници на Блискиот Исток кои се нападнати од страна на иранскиот режим. Нека ги благослови Бог и заштити од секаква штета – порача Херцог.