МААЕ: Иран не им дозволи на инспекторите на Агенцијата пристап до погодените нуклеарни објекти

Иран не им дозволил на претставниците на Меѓународната агенција за атомска енергија (МААЕ) пристап до нуклеарните објекти погодени за време на ланската 12-дневна војна, покажува доверлив извештај на Агенцијата дистрибуиран до членовите.

Во извештајот на МААЕ се нагласува дека Агенцијата затоа „не може да потврди дали Иран ги суспендирал сите активности поврзани со збогатување на ураниумот“, ниту да ја утврди „големината на резервите на ураниум на Иран во засегнатите објекти“.

МААЕ, исто така, изјави дека, со анализа на комерцијално достапните сателитски снимки, забележала „редовна сообраќајна активност околу влезот во комплексот на тунели во Исфахан“.

Објектот Исфахан, кој се наоѓа околу 350 километри југоисточно од главниот град Техеран, е главно познат по производство на ураниумски гас што се внесува во центрифугите за збогатување и прочистување.

За време на јунската 12-дневна војна Израел ги гаѓаше зградите во нуклеарниот комплекс Исфахан, вклучувајќи го и објектот за конверзија на ураниумот.

САД, исто така, го гаѓаа Исфахан со ракети за време на јунската војна.

МААЕ наведува дека, преку анализа на комерцијално достапните сателитски снимки, забележала „активност во некои од засегнатите нуклеарни објекти, вклучувајќи ги и објектите за збогатување во Натанц и Фордо“, но дека „без пристап до овие објекти, не е можно да се потврди природата и целта на тие активности“