Анри: Комо го игра најдобриот фудбал во Италија

Легендата на Арсенал и поранешен француски репрезентативец Тиери Анри оцени дека Комо го игра најдобриот фудбал во италијанската лига.

„Долго време зборувам за ова. Тимот што во моментов игра најдобар фудбал во Италија е Комо“, изјави Анри за CBS Sports Golazo.

„Можеме да разговараме за буџетот и квалитетот на тимот, но ова е моменталната ситуација. Минатата недела веќе ме прашавте каде се италијанските тимови и за жал ситуацијата е јасна“, додаде поранешниот француски репрезентативец.

Комо, кој минатата сезона се врати во Серија А по пауза од 21 година, е шестопласиран табелата со 45 бодови, еден помалку од Јувентус на петтото место.