Намалени трошоците во градежништвото за нови објекти за индивидуално домување

Трошоците во градежништвото за нови објекти за индивидуално домување во четвртото тримесечје од 2025 година во однос на претходното тримесечје намалени се за 0.4 проценти, а трошоците за материјали за 1 процент, додека за 1 процент зголемени се трошоците за вработените.

Во последниот квартал лани, споредено со истиот квартал од претходната година трошоците во градежништвото за нови објекти за индивидуално домување бележат намалување од 0.5 проценти, а намалени се и тие за материјали, за 1.1 процент. Зголемување од 0,8 проценти има кај трошоците за вработените.

Според ДЗС, трошоците во градежништвото за нови објекти за индивидуално домување, од 1 до 4 квартал во 2025 во однос на истиот период од 2024 година се намалени за 0,4 проценти, трошоците за материјали за 0,3 проценти, а трошоците за вработените за 0,6 проценти.

Индексите на трошоците во градежништвото за нови објекти за индивидуално домување се наменети за преиспитување или мониторирање на трошоците направени од градежните претпријатија при изведувањето на процесот на изградба на нови објекти за индивидуално домување. Главни корисници на податоците за индексите на трошоците во градежништвото за нови објекти за индивидуално домување се градежните претпријатија, кои се повикуваат на движењето на трошоците во градежништвото во калкулациите при склучувањето на градежните договори.